Antiguu Exiptu

Article on other languages:

Esfinxe de Gizeh, Exiptu.

L'Antiguu Exiptu foi una civilización que s'orixinó a lo llargo del calce mediu y baxu del ríu Nilu, y qu'algama tres dómines de rellumu faraónicu nos periodos denomaos: Imperiu Antiguu, Imperiu Mediu, ya Imperiu Nuevu. Enanchábase dende'l delta del Nilu nel norte, hasta Elefantina, na primera catarata del Nilu, nel sur, aportando a tener influyencia dende l'Éufrates hasta Jebel Barkal, na cuarta catarata del Nilu, en dómines de máximu espardimientu. El so territoriu tamién abarcó, en desemeyaos periodos, el desiertu oriental y la llinia costera del Mar Roxu, la península del Sinaí, y un gran territoriu occidental dominando los esbillaos oasis. Hestóricamente, foi dixebráu en:Altu y Baxu Exiptu, al sur y al norte respeutivamente.

La civilización exipcia desendolcóse demientres más de 3000 años. Entamó cola xunificación de delles ciudaes del valle del Nilu, alrodiu del 3150 edC., y tiense convencionalmente por fináu nel añu 31 edC, cuando l'Imperiu romanu conquistó y asorbió l'Exiptu ptolemaicu, que desapaez como estáu. Esti asocedimientu nun representó el primer periodu de dominación foriato, pero foi el qu'empobinó a una tresformación adulces na vida política y relixosa del valle del Nilu, conseñando el fin del desendolcu independiente de la so cultura. La so identidá cultural entamara a francese selemente tres les conquistes de los reis de Babilonia (sieglu VI edC) y Macedonia (sieglu IV edC), desapaeciendo la so relixón con l'arribada del cristianismu, na dómina de Xustinianu I, cuando en 535 prohibióse el cultu a la diosa Isis, nel templu de File.

Obtenío de "http://ast.wikipedia.org/wiki/Antiguu_Exiptu"

This article is from Wikipedia. All text is available under the terms of the GNU Free Documentation License.