Bucarest

Poll without page-refresh

Article on other languages:

escudu de Bucarest

Bucarest (Bucureşti en rumanu) ye la capital de Rumania y, al mesmu tiempu, la ciudá más grande del país, centru industrial y comercial. La primer vez qu'apaez mentada la ciudá ye nun documentu de 1459 y dende 1862 ye la capital del estáu. Nel periodu d'enteguerres la so arquiteutura, elegante y burguesa, valió-y el nomatu de "Pequeña Paris". Güei, la ciudá, nun ye namás qu'un conceyu, tamién ye una provincia (judeţ), llamada Ilfov, y ta dividida en seis distritos.

Tabla de conteníos

1 Xeografía
2 Historia
- 2.1 Feches destacaes
- 2.2 Evolución demográfico
3 Cadarma confesional
4 Minoríes
5 Universidaes
6 Equipos deportivos
- 6.1 Fúbol
- 6.2 Baloncestu
7 Bibliografía
8 Enllaces esternos

Xeografía

Bucarest ta nel SE del país, ente Ploieşti y Giurgiu, a orielles del ríu Dâmboviţa, afluente del ríu Danubiu. Amás hai un gran númberu de llagos na redolada de la ciudá, como'l llagu Floreasca, el llagu Tei o'l llagu Colentina, mesmo nel centru de la ciudá hai un llagu, el llagu Cişmigiu. Esti llagu, antiguu trampal na ciudá medieval, ta redoláu pol Xardín Cişmigiu, inauguráu nel 1847 según planos del arquiteutu alemán F.W. Meyer.

Historia

Diz la lleenda que Bucarest foi fundada por un pregueru de nome Bucur (allegre). Paez más probable de toes toes que fuera fundada por Mircea el Vieyu a finales del sieglu XIV.

El primer testimoñu documental apaez nun acta emitida por Vlad Tepes. Nesa dómina la ciudá xugaba un papel estratéxicu na vixilancia del camín que xunía Târgşor y Giurgiu, ésta última sé d'una guarnición otomana.

En 1659, baxo'l reináu de Gheorghe Ghica, Bucarest conviértese na capital del país Rumanu (Ţara Românească), y entama la so modernización: empédrense les cais, fundáse la primer Universidá y constrúise'l Palaciu Mogoşoaiei (Constantin Brâncoveanu), edificiu nel que güei atópase'l Muséu d'Arte Feudal Brâncoveanu. Darréu Bucarest espoxiga dende'l puntu de vista económicu: crez el númberu d'artesanos y la población en xeneral. En 1798 había 30.030 habitantes, y pa 1831 yá yeren más del doble.

Ateneul Român

Adulces va apaeciendo tou un riestru d'instituciones y servicios públicos: el Teatru Nacional, el Xardin Cişmigiu, el Campusantu Şerban Vodă, la Sociedá Académica de Bucarest, la Sociedá Filarmónica de Bucarest, la Universidá de Bucarest, la Estación del Norte, el Diariu Universul, Banco Nacional de Rumania, etc.

Feches destacaes

1459: Primer mención de Bucarest
1465: El príncipe Radu el Guapu escueye Bucarest como residencia real.
1659: Gheorghe Ghica establez ehí la capital.
1808: Abre la "Posada de Manuc" (Hanul lui Manuc), llugar onde diba roblase, en 1812, el Tratáu de Bucarest, ente Rusia y Turquía
1852: Inaugúrase'l Teatru Nacional "I. L. Caragiale"
1872: Primer llinia de tranvía.
1894: Primer tranvía llétricu.
1922: Constrúise con maera l'Arcu'l Trunfu
1928: Entamen les emisiones de la Sociedá Rumana de Radiodifusión
1929: Desaníciase la cabera llinia de tranvía a caballos
1935 Reconstrúise con granitu l'Arcu'l Trunfu
1936: El sociólogu Dimitrie Gusti abre'l Muséu Satului, ún de los primeros museos etnográficos del mundu.
1944, 4 abril: los Aliaos bombardeen la ciudá.
1948: L'Aeropuertu Băneasa entama les sos actividaes
1954: Abre la Opera Rumana
1956, 31 avientu: De cabudañu difúndese la primera emisión televisiva del país.
1970: L'Aeroportu Otopeni empicipia les actividaes
1977, 4 marzu: Un seísmu de 7,2 na escala Richter esfarrapa la mayor parte del cascu antiguu de Bucarest
1979: Inaugúrase la primer llinia de metro
1981 - 1988: Constrúise la Casa'l Pueblu de Bucarest, el segundu mayor edificiu del mundu. Pa construyilo, baltáronse edificios nuna superficie equivalente a la de la ciudá de Venecia
2005: Adriean Videanu alcalde de la capital

Evolución demográfico

1798: 30.030
1831: 60.587
1877: 177.302
1930: 639.040
1956: 1.236.905
1964: 1.372.130
1998: 2.029.899
2002: 1.921.753
2005: 1.929.615

Cadarma confesional

1.850.414 ortodoxos (96,05%), 23.450 católicos romanos (1,21%), 9.488 musulmanes (0,49%), 7.558 católicos griegos (0,39%), 5.452 pentecostales, 4.381 adventistas

Minoríes

Comunidá xudía

Antañu yera la comunidá más numberosa. En 1930 vivíen en Bucarest 69.885 xudíos, que representaben en 10,93% de la población. Los fechos de la Segunda Guerra Mundial, y darréu les migraciones a Israel llevaron a la desaparición de la comunidá xudía de Bucarest. Sicasí sigue furrulando un Teatru Hebreu estatal.

Comunidá húngara

Nel añu 1930 vivíen en Bucarest 24.052 húngaros, el 3,76% de la población. Nl añu 2002 la población ye de 5.834 maguiares, namás el 0,3% del total. Publícase en Bucarest el periódicu n'húngaru de tirada nacional Új Magyar Szó